Д.К. Сивцев — Суорун Омоллоон 120 сааhа

Саха сирин народнай суруйааччыта Дмитрий Кононович Сивцев – Суорун Омоллоон төрөөбүтэ 120 сыла. Кини 1906 сыллаахха, балаҕан ыйын 14 күнүгэр Таатта оройуонун 3 Дьохсоҕон нэһилиэгэр күн сирин көрбүтэ.             Дмитрий Кононович үгүс өрүттээх айымньылаах үлэтэ көлүөнэттэн көлүөнэгэ бэриллэр. Кини драматург, прозаик уонна поэт быһыытынан биллэр. Маҥнайгы айымньылара «Хагдарыйбат ньургуһун» хоһоон, «Өлүөнэ өрүс» кэпсээн, «Күөх көппө» драма.

Дьон сэргэ биһирэбилин ылбыт айымньыларынан буолаллар: «Чөөчө», «Чүөчээски», «Сордоох суха», «Аанчык» кэпсээннэрэ, «Күкүр Уус», «Айаал», «Сайсары», «Күн күөрэйиэн иннинэ» драмалара, «Ньургун Боотур» опера, «Сир симэҕэ» балет. Ону таһынан оҕолорго аналлаах остуоруйалары, учебниктары суруйан хаалларбыта, элбэх опера уонна балет либреттоларын ааптара буолар. 2001 сылтан Опера уонна балет театра Дмитрий Кононович Сивцев – Суорун Омоллоон аатын сүгэр.

Суорун Омоллоон нуучча уонна саха норуоттарын доҕордоһууларын, бүттүүн киһи аймах үтүөҕэ уонна тапталга олоҕурбут бириинсиптэрин киэҥник тарҕатыыга бэриниилээх улэтэ,  култуурунай-историческай нэһилиэстибэ сайдыытыгар сүҥкэн кылаата ыччаты иитиигэ олус үрдүк суолталаахтар.

Эдэр ыччат эргиччи сайдыытыгар тумэл оруола олус улахан. Ол курдук Суорун Омоллоон 4 түмэл арыллыытыгар сүҥкэн кылаатын киллэрбит киһинэн буолар: Ытык-Күөлгэ “Таатта” диэн литературно-художественнай, Таатта улууһун Чөркөөҕөр, 1977 сыллаахха аһыллыбыт, мемориальнай, Уус-Алдан улууһун Суоттутугар “Доҕордоьуу” уонна Дьокуускай куоракка П.А. Ойуунускай аатынан түмэллэр.

Суорун Омоллоон саха литературатыгар 1926 с., 20 саастааҕар, «Чолбон» сурунаал иккис нүөмэригэр бэчээттэммит «Өлүөнэ өрүс» диэн кэпсээнинэн киирбитэ. Кыра алааска төрөөбүт, улааппыт 17-лээх уол аан бастаан Дьокуускайга киирэн иһэн Өлүөнэ өрүһү хайдах сөҕө – махтайа көрбүтүн туһунан суруйар. Бу кэпсээни Т.Уо. (Тыа Уола)  диэн илии баттаабыта.