Олунньу 13 күнэ — Төрөөбүт тыл уонна сурук-бичик күнэ

Саха омук олоҕор үйэлээх кэскили төрүттээбит, үөрэх-сайдыы киэҥ дуолун тэлэйбит саха чулуу уола Семен Андреевич Новгородов төрөөбүт алгыстаах күнэ!
Бу күҥҥэ сөп түбэһиннэрэн, Саха Республикатын маҥнайгы Президенэ М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕар олоҕуран — олунньу 13 күнэ — Төрөөбүт тыл уонна сурук-бичик күнүнэн биллэриллибитэ.
Бу күн, Научнай библиотека ааҕар саалатыгар анал тэрээһин ыытылынна. Сахалыы куттаах, сахалыы саҥалаах тэрээһин кыттыылаахтара саалы толору муһуннулар.
Төрөөбүт сахатын тылын сайыннарыыга, чинчийиигэ олоҕун анаабыт, саха алфавитын төрүттээбит, лингвист-учуонай Семен Андреевич Новгородов олоҕор, айар үлэтигэр олоҕуран бэлэмнэммит матырыйаалы билиһиннэрдибит уонна билиини бэрэбиэркэлиир тургутук ыытылынна.
Сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан» суруйуута ыытыллынна. Буойун суруйааччы Т.Е. Сметанин «Саллаат сүрэҕэ» хомуурунньугуттан «Саллаат сүрэҕэ» саллаат дневнигиттэн быһа тардыыны 51 кыттааччы үрдүк таһымҥа суруйан, дьүүллүүр сүбэ сөҕүүтүн уонна махталын ыллылар. Биллэн турар, элбэхтик сахалыы ааҕар, саха тылыгар уhулуччу билиилээх кыттааччылар «Айар» кинигэ кыһатын сэмэй бэлэхтэринэн наҕараадаланнылар, бары кыттааччыларга туоhу сурук туттарылынна.
Түмүккэ кыайыыны ситистилэр:
1 миэстэ – Старостина Джамилия, ФАБ ЭБП-23
2 миэстэ – Старостина Дайаана, ФВМ ВСЭ-24
3 миэстэ – Коновалов Денис, ИФ ТС-22
Бары кыттааччыларга махталбытын тиэрдэбит.
Сахалыы сайаҕастык саҥарар, иэйиибитин истиҥник этинэр төрөөбүт тылбыт үйэлэргэ сүппэккэ үүнэ-сайда турдун!