Нооһой айар киэһэтэ алыптаах дорҕоону дьиэрэттэ…

Агровуз иһинэн үлэлиир К.Д.Уткин аатынан научнай библиотека  ааҕар саалатыгар профессор Афанасий Чугунов айар биэчэрэ буолан ааста.

Кини Саха Өрөспүүбүлүкэтин Бочуоттаах  олохтооҕо, Арктикатааҕы судаарыстыбаннай агротехнологическай университетын тыа хаһаайыстыбатын билимин доктора, профессор, суруйааччы, публицист,  Российскай Федерация уонна Саха Республикатын  билимин үтүөлээх деятелэ, Саха Республикатын Наукатын академиятын академига, Россия суруйааччыларын уонна суруналыыстарын сойууһун чилиэнэ, «Доҕордоһуу» уордьан, «Үлэҕэ килбиэнин» иһин мэтээл хаһаайына, Мэҥэ-Хаҥалас оройуонун, Мэлдьэхси нэһилиэгин бочуоттаах олохтооҕо.

«Афанасий Васильевич туспа суоллаах – иистээх суруйааччы, хомоҕой тыллаах хоһоонньут, сиэдэрэйдик суруйар сэһэнньит. Кини айымньылара үксүн тыа сирин олоҕор, сиэргэ- майгыга, үлэҕэ- хамнаска, олоххо — дьаһахха, айылҕаҕа, тапталга сыһыаннаахтар.  Ону таһынан  ырыа буолбут хоһоонноро  үгүстэр”, — диэн айар биэчэр ыытааччыта, Научнай библиотека сэбиэдиссэйэ Валерия Ефимова көрсүһүүнү саҕалаата.

Айар киэһэҕэ кыттыыны кини үөлээннээхтэрэ, доҕотторо-атастара уонна аныгы кэм кэнчээри ыччата – университет устудьуоннара көхтөөх кыттыыны ыллылар.

АГАТУ научнай үлэҕэ уонна инновацияҕа проректор эбээһинэһин толорооччу, ветеринарнай наука кандидата, доцент Константин  Нифонтов эҕэрдэтин тиэртэ уонна ыччаты наукаҕа болҕомтолоох буоларга туһаайда.

Академик, М.К.Аммосов аатынан Хотугулуу-Илиҥҥи федеральнай университет профессора, литератураны ырытааччы Анатолий Бурцев бэрт дириҥ ис хоһоонноох дакылаатыгар үөлээннээҕин айар үлэтин ырытта ыччат айымньылары төһө билэрин тест оҥорон бэрэбиэркэлээтэ.

Айар киэһэҕэ тылы эттилэр поэт, прозаик, литературнай кириитик, суруналыыс, Саха Республикатын народнай суруйааччыта, Саха Республикатын культуратын үтүөлээх үлэһитэ, Россия суруйааччыларын сойууһун чилиэнэ Семен Попов –Тумат, ону кытта педагогическай наука кандидата, “Хотугу сулус” уордьан кавалера, биллиилээх советскэй партийнай үлэһит Матвей Мучин, суруналыыс, суруналыыстар сойуустарын чилиэнэ, Саха Республикатын культуратын үтүөлээх үлэһитэ Иван Борисов уо.д.а.