«Төрөөбүт тыл уонна сурук-бичик күнүгэр» аналлаах тэрээһин

Бүгүн, саха омук олоҕор үйэлээх кэскили төрүттээбит, үөрэх-сайдыы киэҥ дуолун тэлэйбит саха чулуу уола Семен Андреевич Новгородов төрөөбүт алгыстаах күнэ!

Бу күҥҥэ сөп түбэһиннэрэн, Саха Республикатын маҥнайгы Президенэ М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕар олоҕуран — олунньу 13 күнэ — Төрөөбүт тыл уонна сурук-бичик күнүнэн биллэриллибитэ. Бу бэлиэ күнүнэн К.Д. Уткин аатынан Научнай библиотека уонна Иитэр үлэҕэ отдел коллективын аатыттан эҕэрдэлиибит!

Бу күн, Научнай библиотека ааҕар саалатыгар анал тэрээһин ыытылынна. Сахалыы куттаах, сахалыы саҥалаах тэрээһин кыттыылаахтара саалы толору муһуннулар.

Наука билимин дуоктара, профессор Константин Максимович Степановы дорҕоон кутун иҥэринэн, алыптаах тыл алыбар ылларан, төрөөбүт тылынан суруйар хомоҕой тыллаах хоһоонньут быһыытынан билиһиннэрдибит. Константин Максимович ыччакка туһулаан, төрөөбүт төрүт тылбыт туһунан санааларын, сүбэлэрин үллэһиннэ. Дойдуга таптал, саха тыла, төрөөбүт дойду, төрөөбүт айылҕа, сырдык санаа, олох туһунан үгүс хоһооно сурукка тиһиллэн, хоһооннорун хомуурунньуга буолан тахсыбытын билиһиннэрдэ.
Төрөөбүт сахатын тылын сайыннарыыга, чинчийиигэ олоҕун анаабыт, саха алфавитын төрүттээбит, лингвист-учуонай Семен Андреевич Новгородов олоҕор, айар үлэтигэр олоҕуран бэлэмнэммит матырыйаалы билиһиннэрдибит.

Сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан» суруйуута ыытыллынна. Саха литературатын төрүттээччилэртэн биирдэстэрэ, драматург, суруйааччы Николай Денисович Неустроев «Балыксыт» кэпсээниттэн быһа тардыыны 40 кыттааччы үрдүк таһымҥа суруйан, дьүүллүүр сүбэ сөҕүүтүн уонна махталын ыллылар. Биллэн турар, элбэхтик сахалыы ааҕар, саха тылыгар уhулуччу билиилээх кыттааччылар сэмэй бэлэхтэринэн ,»Киин» киинэ театырыгар билиэттэринэн, «Айар» кинигэ кыһатын сахалыы суруктаах уруучукаларынан бэлиэтэннилэр, бары кыттааччыларга туоhу сурук туттарылынна.

Түмүккэ кыайыыны ситистилэр:

1 миэстэ-Кладкина Екатерина АТФ БТ-23

2 миэстэ- Васильев Егор ИФ ЭТ-23

3 миэстэ-Туласынова Люда КТиУ ЗТ-23

Бары кыттааччыларга махталбытын тиэрдэбит.
Сахалыы сайаҕастык саҥарар, иэйиибитин истиҥник этинэр төрөөбүт тылбыт үйэлэргэ сүппэккэ үүнэ-сайда турдун!